ప్రతి నెల బియ్యం పంపిణీతో పాటు హమాలీల బిల్లులు 1వ తేదీనే చెల్లించాలి
రాయల్ పోస్ట్ న్యూస్ భువనగిరి జులై 20/3 నెలల రేషన్ బియ్యం పంపిణీ విధానాన్ని రద్దు చేసి పాత పద్ధతిని యధావిధిగా కొనసాగించి ప్రతి నెల 1వ తేదీన హమాలీ బిల్లులు చెల్లించే విధంగా రాష్ట్ర ప్రభుత్వం చర్యలు తీసుకోవాలని ఏఐటీయూసీ రాష్ట్ర కార్యదర్శి ఎండీ ఇమ్రాన్ ప్రభుత్వాన్ని డిమాండ్ చేశారు.
సోమవారం రోజున ఏఐటీయూసీ అనుబంధ తెలంగాణ రాష్ట్ర సివిల్ సప్లై హమాలీస్ యూనియన్, యాదాద్రి భువనగిరి జిల్లా కమిటీ ఆధ్వర్యంలో కలెక్టరేట్ కార్యాలయం ముందు ధర్నా నిర్వహించిన అనంతరం ప్రజావాణిలో భువనగిరి ఆర్డీవో కృష్ణారెడ్డి మరియు సివిల్ సప్లై డిఎం హరికృష్ణ గార్లకు వేరువేరుగా వినతి పత్రం సమర్పించడం జరిగింది. ఈ సందర్భంగా ఇమ్రాన్ మాట్లాడుతూ హమాలీలు కూడా మనుషులే కానీ యంత్రాలు కాదని 3 నెలల బియ్యన్ని ఒకటే నెల ఎలా దిగుమతి చేస్తారని ఆయన ప్రశ్నించారు… 3 నెలలకు ఒకేసారి రేషన్ బియ్యం పంపిణీ విధానం వల్ల హమాలీ కార్మికులు, రేషన్ డీలర్లు, లబ్ధిదారులు తీవ్ర ఇబ్బందులు ఎదుర్కొంటున్నారని తెలిపారు. ఈ విధానంతో హమాలీలకు ప్రతి నెల పని లేక ఉపాధి దెబ్బతింటోందని, ఆదాయం తగ్గి కుటుంబాల జీవనం కష్టమవుతోందన్నారు.
అలాగే ఒకేసారి భారీ మొత్తంలో బియ్యం నిల్వ చేయాల్సి రావడం వల్ల రేషన్ దుకాణాల్లో స్థలాభావం ఏర్పడుతోందని, వర్షాకాలంలో బియ్యం తడవడం, నాణ్యత దెబ్బతినే ప్రమాదం ఉందని పేర్కొన్నారు. మూడు నెలల బియ్యాన్ని ఇంట్లో నిల్వ చేసుకునేందుకు పేద కుటుంబాలకు తగిన స్థలం లేక తీవ్ర ఇబ్బందులు ఎదురవుతున్నాయని తెలిపారు.
ఈ సందర్భంగా ప్రభుత్వం వెంటనే మూడు నెలలకు ఒకసారి రేషన్ బియ్యం పంపిణీ విధానాన్ని రద్దు చేసి, గతంలో అమలులో ఉన్నట్లుగా ప్రతి నెలా రేషన్ బియ్యం పంపిణీ పునరుద్ధరించాలని డిమాండ్ చేశారు. అలాగే ప్రతి నెల 1వ తేదీన సివిల్ సప్లై హమాలీల బిల్లులను చెల్లించాలని, జిల్లాలోని భువనగిరి, చౌటుప్పల్ కేంద్రాల్లో ప్రభుత్వ సొంత సివిల్ సప్లై గోడౌన్లను నిర్మించాలని, పెంచిన కూలీ రేట్ల జిఓ ను వెంటనే విడుదల చేయాలని డిమాండ్ చేశారు. ఈ డిమాండ్లను ప్రభుత్వం వెంటనే పరిష్కరించాలని, లేనిపక్షంలో ఏఐటీయూసీ అనుబంధ తెలంగాణ రాష్ట్ర సివిల్ సప్లై హమాలీస్ యూనియన్ ఆధ్వర్యంలో పెద్ద ఎత్తున ఆందోళన కార్యక్రమాలు చేపడతామని తెలిపారు.
ఈ కార్యక్రమంలో ఏఐటీయూసీ జిల్లా కార్యవర్గ సభ్యులు సామల శోభన్ బాబు, హమాలీ యూనియన్ జిల్లా వర్కింగ్ ప్రెసిడెంట్ గౌరవంతుల శ్రీనివాస్, జిల్లా అధ్యక్షులు పల్లె శ్రీనివాస్, ఉపాధ్యక్షులు జంగ నర్సయ్య, ప్రధాన కార్యదర్శి పాపగళ్ల శంకరయ్య, సహాయ కార్యదర్శి పురుగుల రవి, కోశాధికారి గొరిగే శంకరయ్య, నాయకులు పిన్నం జగన్, మడుగుల స్వామి, కొట్టూరి శ్రీను, బోదల యాదయ్య, స్వామి, మైసమ్మ, గణేష్, కిష్టయ్య, సైదులు, జహంగీర్ తదితరులు పాల్గొన్నారు.
