న్యూఢిల్లీ, ఆంధ్రప్రభ: దేశంలో పేదరికం తగ్గుముఖం పట్టిందని, గత కొన్నేళ్లలో సుమారు 50 కోట్ల మంది ప్రజలు పేదరికం నుంచి బయటపడ్డారని ప్రధానమంత్రి నరేంద్ర మోదీ వెల్లడించారు. అయితే ఈ విజయాన్ని కొందరు గుర్తించేందుకు ఇష్టపడటం లేదని ప్రతిపక్షాలపై పరోక్ష విమర్శలు చేశారు. ప్రభుత్వ సంక్షేమ పథకాలు, అభివృద్ధి కార్యక్రమాల వల్లే సామాన్య ప్రజల జీవితాల్లో మార్పు సాధ్యమైందని పేర్కొన్నారు.
గుజరాత్లోని 182 అసెంబ్లీ నియోజకవర్గాల పరిధిలో నిర్వహించిన దీపావళి అనంతర ‘స్నేహ్ మిలన్’ కార్యక్రమంలో మోదీ వర్చువల్గా పాల్గొన్నారు. ఈ సందర్భంగా బీజేపీ కార్యకర్తలను ఉద్దేశించి మాట్లాడారు. ప్రపంచ బ్యాంకు గణాంకాలను ప్రస్తావిస్తూ.. 2011లో దేశంలో తీవ్ర పేదరికం 27.1 శాతంగా ఉండగా, 2023 నాటికి అది 2.6 శాతానికి తగ్గినట్లు వివరించారు. ఈ మార్పుతో దాదాపు 49.6 కోట్ల మంది పేదరికపు స్థాయి నుంచి బయటపడినట్లు పేర్కొన్నారు.
దేశంలో పేదరికం తగ్గడం అనేది ఎంతో సంతోషించాల్సిన పరిణామమని మోదీ అన్నారు. స్వాతంత్ర్యం కోసం పోరాడిన మహనీయులు ఇప్పుడు దేశం సాధిస్తున్న పురోగతిని చూసి సంతోషించేవారని వ్యాఖ్యానించారు. అయితే ఈ విజయాన్ని కొందరు బహిరంగంగా అంగీకరించేందుకు వెనుకాడుతున్నారని అన్నారు. బీజేపీ ప్రభుత్వ హయాంలో ఈ మార్పు చోటుచేసుకోవడమే అందుకు కారణమని ప్రతిపక్షాలపై విమర్శలు చేశారు. తమ ప్రభుత్వం చేపట్టిన ప్రయత్నాలు మంచి ఫలితాలను ఇస్తున్నాయని పేర్కొన్నారు.
పేద కుటుంబాల జీవన ప్రమాణాలను మెరుగుపరిచేందుకు తమ ప్రభుత్వం అనేక కార్యక్రమాలను అమలు చేసిందని ప్రధాని గుర్తుచేశారు. జనధన్ ద్వారా బ్యాంకు ఖాతాలు, ఉజ్వల పథకం కింద ఎల్పీజీ కనెక్షన్లు, విద్యుత్ సదుపాయం, ఆయుష్మాన్ భారత్ ద్వారా ఆరోగ్య భద్రత వంటి పథకాలను ప్రస్తావించారు. ఈ కార్యక్రమాలు ప్రారంభించిన సమయంలో వాటి వల్ల ఎంతవరకు ప్రయోజనం ఉంటుందంటూ విమర్శలు వచ్చాయని, అయినప్పటికీ వాటిని కొనసాగించామని చెప్పారు.
దళితులు, గిరిజనులు, మహిళలు, ఆర్థికంగా వెనుకబడిన వర్గాలకు ప్రభుత్వ పథకాల ద్వారా ప్రయోజనాలు అందాయని మోదీ పేర్కొన్నారు. సమాజంలోని అన్ని వర్గాలకు అభివృద్ధి ఫలాలు చేరినప్పుడే నిజమైన సామాజిక న్యాయం సాధ్యమవుతుందని అభిప్రాయపడ్డారు. రాజకీయాలకు అతీతంగా దేశ ప్రయోజనాలకు ప్రాధాన్యత ఇవ్వాలని పార్టీ కార్యకర్తలకు సూచించారు.