భువనగిరి రాయల్ పోస్ట్ న్యూస్ ఆగస్ట్ 15/




యాదాద్రి భువనగిరి జిల్లా భువనగిరి పట్టణంలో కాంగ్రెస్ పార్టీ ఆధ్వర్యంలో స్వాతంత్ర్య దినోత్సవ వేడుకలు వైభవంగా నిర్వహించారు. ఈ సందర్భంగా పాలకుర్తి నియోజకవర్గం కాంగ్రెస్ పార్టీ అబ్జర్వర్ పోత్నక్ ప్రమోద్ కుమార్ ముఖ్య అతిథిగా హాజరై పలు కేంద్రాల్లో జాతీయ పతాకాన్ని ఎగురవేశారు. టౌన్ కాంగ్రెస్ కార్యాలయం, హౌసింగ్ బోర్డ్ కాలనీ, మహాత్మా గాంధీ డబ్బా అసోసియేషన్, ఎస్.ఎస్.ఆర్ యూత్, సూర్య యూత్ తదితర ప్రాంతాల్లో ఆయన జాతీయ జెండాలను ఆవిష్కరించారు.
ఈ సందర్భంగా ప్రమోద్ కుమార్ మాట్లాడుతూ, మహాత్మా గాంధీ, పండిట్ జవహర్లాల్ నెహ్రూ, సర్దార్ వల్లభాయ్ పటేల్, డాక్టర్ బాబాసాహెబ్ అంబేద్కర్, మౌలానా అబుల్ కలాం ఆజాద్, అల్లూరి సీతారామరాజు, సుభాష్ చంద్రబోస్, భగత్ సింగ్, బాబు జగ్జీవన్ రామ్ వంటి మహనీయుల త్యాగాలు, పోరాట ఫలితంగానే నేడు మనం స్వాతంత్ర్య ఫలాలను అనుభవిస్తున్నామని గుర్తుచేశారు. దేశ స్వాతంత్ర్యం కోసం చారిత్రాత్మక పోరాటాలు చేసి, ఎన్నో త్యాగాలు చేసిన ఘనత కాంగ్రెస్ పార్టీదేనని కొనియాడారు.
నేటి బిజెపి పాలకులు దేశాన్ని మతాలు, వర్గాల పేరుతో విడదీసి ముక్కలు చేయాలని చూస్తున్నారని, వారి ప్రయత్నాలను కాంగ్రెస్ పార్టీతో పాటు యావత్ భారత జాతి ప్రజలు అడ్డుకుంటారని హెచ్చరించారు. భారతదేశాన్ని మరింత బలమైన, సురక్షితమైన, అభివృద్ధి చెందిన దేశంగా తీర్చిదిద్దేందుకు ప్రతి పౌరుడు కర్తవ్యనిష్ఠతో ముందుకు సాగాలని కోరారు.
ప్రజా ప్రభుత్వం ప్రజల సంక్షేమం, అభివృద్ధికి కట్టుబడి ఉందని, ఎన్నికల సమయంలో ఇచ్చిన మాట ప్రకారం ఆరు గ్యారంటీలను అమలు చేసేందుకు కంకణం కట్టుకుందని తెలిపారు. మహాలక్ష్మి పథకం, రాజీవ్ ఆరోగ్యశ్రీ, ఇందిరమ్మ ఇండ్లు, భూ భారతి, రైతు భరోసా, రైతు బీమా, కొత్త రేషన్ కార్డులు, ఉచిత సన్న బియ్యం పంపిణీ తదితర పథకాలతో ప్రభుత్వం ప్రగతి పథంలో పయనిస్తోందని వివరించారు.
ఈ కార్యక్రమంలో కౌన్సిలర్ బింగి నరేష్, బాలేశ్వర్, కో-ఆప్షన్ సభ్యులు కౌసర్, వీరపాక నరసింహ, నర్సింగ్ రావు, ప్రదీప్, భరత్, రామ్మోహన్, వంశీ, యాదగిరితో పాటు హౌసింగ్ బోర్డ్ కాలనీ యూత్ సభ్యులు, కాంగ్రెస్ నాయకులు, కార్యకర్తలు పాల్గొన్నారు.