యాదాద్రి జిల్లాలో రూ.54 కోట్ల విలువైన డ్రగ్స్ స్వాధీనం: నలుగురు నిందితుల అరెస్ట్
భువనగిరి: యాదాద్రి-భువనగిరి జిల్లా పోలీసు కమిషనరేట్ పరిధిలో భారీ డ్రగ్స్ రాకెట్ గుట్టరట్టయింది. జిల్లా ఎస్పీ శ్రీ అక్షాన్ష్ యాదవ్, IPS ఆదేశాల మేరకు బీబీనగర్ పోలీసులు, SOT బలగాలు సంయుక్తంగా నిర్వహించిన తనిఖీల్లో రూ.54 కోట్ల విలువైన 27 కిలోల మెఫెడ్రోన్ డ్రగ్ను స్వాధీనం చేసుకున్నారు. ఈ కేసులో నలుగురు నిందితులను అరెస్ట్ చేయగా, మరో నలుగురు పరారీలో ఉన్నారు.
ఘటన వివరాలు: విశ్వసనీయ సమాచారంతో ఈ నెల 8న కొండమడుగు గ్రామ శివారులో పోలీసులు తనిఖీలు చేపట్టారు. నాగ్పూర్ నమోదు కలిగిన ఫార్చ్యూనర్ కారు (MH-49-CW-1313)ను అడ్డుకుని సోదా చేయగా 27 కిలోల మెఫెడ్రోన్, డ్రగ్ తయారీకి ఉపయోగించే 40 కిలోల అసిటోన్ లిక్విడ్ బయటపడ్డాయి.
అరెస్ట్ అయిన నిందితులు:
- A1. చేతన్ మధుకర్ మెష్రామ్ (49, నాగ్పూర్): డ్రగ్ తయారీకి ఆర్థిక సహకారం, ఆర్గనైజర్.
- A2. ముజామల్ హక్ (25, అస్సాం): డ్రగ్ తయారీ సహాయకుడు.
- A3. ఆకాశ్ అశోక్ గవాండే (31, నాగ్పూర్): రవాణా సహాయకుడు.
- A4. ఉపద్రష్ట రమణ మూర్తి (65, హైదరాబాద్): వేటుకూరి ల్యాబ్స్ ఇన్చార్జ్.
పరారీలో ఉన్నవారు: ఎం.డి. అయూబ్ అలీ (అస్సాం), చందా ప్రదీప్ ఠాకూర్ (నాగ్పూర్), గోపాల్ సిర్పట్ పటేలియా (నాగ్పూర్), మరియు వేటుకూరి ల్యాబ్స్ యజమాని యేటుకూరి రామరాజు (పీర్జాదిగూడ). వీరి కోసం ప్రత్యేక బృందాలతో గాలింపు చర్యలు ముమ్మరం చేశారు.
ల్యాబ్పై దాడి – స్వాధీనం చేసుకున్న సొత్తు: నిందితులు కొండమడుగులోని ‘వేటుకూరి ల్యాబ్స్’లో ఆగస్టు 5 నుంచి 7 మధ్య ఈ డ్రగ్ను తయారు చేసి, నాగ్పూర్కు తరలించి విక్రయించేందుకు ప్లాన్ చేసినట్లు విచారణలో తేలింది. ల్యాబ్లో తనిఖీలు చేసి డ్రగ్ తయారీకి వాడే రియాక్టర్, సెంట్రిఫ్యూజ్ పరికరాలు, 6 సెల్ఫోన్లు, ఫార్చ్యూనర్ కారును పోలీసులు సీజ్ చేశారు. చట్టపరంగా ల్యాబ్ను సీజ్ చేసేందుకు చర్యలు చేపట్టారు.
ఎస్పీ హెచ్చరిక: జిల్లాలో డ్రగ్స్ తయారీ, రవాణా, విక్రయాలపై కఠిన చర్యలు ఉంటాయని ఎస్పీ అక్షాన్ష్ యాదవ్ హెచ్చరించారు. డ్రగ్స్ రహిత సమాజ స్థాపనకు ప్రజలు సహకరించాలని, సమాచారం ఉంటే పోలీసులకు తెలపాలని కోరారు.
ఈ ఆపరేషన్లో ప్రతిభ చూపిన SDPO బి. శ్రీనివాస్ నాయుడు, SOT ఇన్స్పెక్టర్ టి. ప్రవీణ్ బాబు, బీబీనగర్ ఇన్స్పెక్టర్ ఎం. ప్రభాకర్ రెడ్డి, ఎస్ఐలు ఎస్. కృష్ణయ్య, ఎన్. రమేష్ మరియు పోలీస్ సిబ్బందిని ఎస్పీ అభినందించారు.
