రాయల్ పోస్ట్ న్యూస్ భువనగిరి జులై 20/భువనగిరి పట్టణంలోని ఖాజీమహళ్ళ లో ఎస్సీ బాలికల వసతి గృహం కొరకు నూతన భవనాన్ని వెంటనే నిర్మించాలని బాలల హక్కుల పరిరక్షణ వేదిక నాయకులు కొడారి వెంకటేష్ సోమవారం కలెక్టరేట్ లో జరిగిన ప్రజావాణి కార్యక్రమంలో ట్రేనీ కలెక్టర్ “కృతిక” కు వినతి పత్రం సమర్పించారు. ఈ సందర్భంగా కొడారి వెంకటేష్ మాట్లాడుతూ భువనగిరి పట్టణంలో సర్వే నెంబర్ 6 లో సుమారు ఒక ఎకరం విస్తీర్ణంలో గతంలో ఎస్సీ బాలికల వసతి గృహం ఉండేదని, అది శిథిలావస్థకు చేరుకోవడంతో భవనం నిరుపయోగంగా ఉందని ఆయన అన్నారు. సుమారు 500 మంది బాలికలు ఉండేందుకు అనువుగా ఉన్న భవనం స్థలాన్ని కొందరు కబ్జా దారులు కబ్జా చేయడానికి ప్రయత్నం చేస్తున్నారని ఆయన తెలిపారు. ప్రభుత్వం వెంటనే అట్టి స్థలంలో ఎస్సీ బాలికలకు వసతి గృహం నిర్మాణం చేపట్టాలని ఆయన డిమాండ్ చేశారు. ప్రస్తుతం ఎస్సీ బాలికల వసతి గృహం అద్దె భవనంలో కొనసాగుతుందని, ప్రభుత్వం అద్దె రూపంలో నెలకు యాబై వేల రూపాయల చెల్లిస్తుందని ఆయన అన్నారు. జిల్లా కలెక్టర్ చొరవ తీసుకుని నూతన భవన నిర్మాణానికి కృషి చేయాలని వెంకటేష్ కోరారు.

