కులగణనలో ప్రతి కులానికి యూనిక్ కోడ్ అవసరం – గుజ్జ సత్యం…కేంద్ర మంత్రి రాందాస్ అథవాలేకు వినతిపత్రం..బీసీల సమస్యల పరిష్కారానికి సానుకూలంగా స్పందించిన కేంద్ర మంత్రి: గుజ్జ సత్యం

రాయల్ పోస్ట్ న్యూస్ హైదరాబాద్, జూలై 15: దేశవ్యాప్తంగా నిర్వహించనున్న కులగణనలో ప్రతి కులానికి ప్రత్యేకమైన యూనిక్ నేషనల్ కాస్ట్ కోడ్ (Unique National Caste Code) కేటాయించి, అదే కోడ్ ఆధారంగా కులగణన చేపట్టాలని కేంద్ర సామాజిక న్యాయం, సాధికారత శాఖ సహాయ మంత్రి రాందాస్ అథవాలేను కోరినట్లు జాతీయ బీసీ సంక్షేమ సంఘం జాతీయ ఉపాధ్యక్షులు, బీసీ జాయింట్ యాక్షన్ కమిటీ (బీసీ జేఏసీ) రాష్ట్ర కోఆర్డినేటర్ గుజ్జ సత్యం తెలిపారు.

కేంద్ర మంత్రిని కలిసి సమగ్ర వినతిపత్రం సమర్పించిన అనంతరం ఆయన మీడియాతో మాట్లాడారు. దేశంలో ఒకే కులానికి వివిధ రాష్ట్రాల్లో వేర్వేరు పేర్లు, స్పెల్లింగ్‌లు, స్థానిక ఉచ్చారణలు ఉండడం వల్ల కులగణనలో తప్పిదాలు జరిగే అవకాశం ఉందన్నారు. అందువల్ల ప్రతి కులానికి కేంద్ర ప్రభుత్వం ఒకే జాతీయ గుర్తింపు కోడ్ కేటాయిస్తే దేశవ్యాప్తంగా ఖచ్చితమైన జనాభా గణాంకాలు నమోదవుతాయని వివరించినట్లు చెప్పారు.

శాస్త్రీయ కులగణనతోనే సామాజిక న్యాయం

కులగణన ద్వారా లభించే గణాంకాల ఆధారంగానే భవిష్యత్తులో రిజర్వేషన్లు, సంక్షేమ పథకాలు, నిధుల కేటాయింపులు, విధాన నిర్ణయాలు రూపొందనున్న నేపథ్యంలో, గణన ప్రక్రియ అత్యంత శాస్త్రీయంగా, పారదర్శకంగా ఉండాలని గుజ్జ సత్యం పేర్కొన్నారు. యూనిక్ కాస్ట్ కోడ్ అమలైతే డూప్లికేట్ నమోదు, స్పెల్లింగ్ పొరపాట్లు, ప్రాంతీయ పేర్ల వల్ల ఏర్పడే అయోమయం పూర్తిగా తొలగిపోతుందని అన్నారు.

కేంద్ర పరిధిలోని సమస్యలపై వినతి

కేంద్ర ప్రభుత్వ ఉద్యోగాలు, విద్యాసంస్థల్లో బీసీ రిజర్వేషన్ల పూర్తి అమలు, బ్యాక్‌లాగ్ పోస్టుల భర్తీ, జాతీయ వెనుకబడిన తరగతుల కమిషన్ (NCBC) అధికారాల బలోపేతం, బీసీ విద్యార్థులకు మరిన్ని స్కాలర్‌షిప్‌లు, కేంద్ర బడ్జెట్‌లో బీసీలకు జనాభా ప్రాతిపదికన నిధుల కేటాయింపు వంటి అంశాలను కూడా కేంద్ర మంత్రి దృష్టికి తీసుకెళ్లినట్లు తెలిపారు.

సానుకూలంగా స్పందించిన అథవాలే

వినతిపత్రంలోని అంశాలను కేంద్ర మంత్రి రాందాస్ అథవాలే శ్రద్ధగా విన్నారని, ముఖ్యంగా యూనిక్ నేషనల్ కాస్ట్ కోడ్ ప్రతిపాదనను సానుకూలంగా స్వీకరించారని గుజ్జ సత్యం తెలిపారు. సంబంధిత అంశాలను కేంద్ర ప్రభుత్వ దృష్టికి తీసుకెళ్లి, సంబంధిత శాఖలతో చర్చించి పరిష్కారం దిశగా చర్యలు తీసుకునేందుకు కృషి చేస్తామని మంత్రి హామీ ఇచ్చినట్లు వెల్లడించారు.

బీసీలకు ఖచ్చితమైన గణాంకాలే అభివృద్ధికి పునాది

దేశంలో బీసీల సామాజిక, విద్యా, ఆర్థిక అభివృద్ధికి ఖచ్చితమైన కులగణన అత్యంత అవసరమని గుజ్జ సత్యం పేర్కొన్నారు. జనాభా ఆధారిత సంక్షేమ విధానాలు సమర్థవంతంగా అమలుకావాలంటే, కులగణనలో శాస్త్రీయ విధానాలను కేంద్ర ప్రభుత్వం తప్పనిసరిగా అమలు చేయాలని ఆయన కోరారు.

ఈ కార్యక్రమంలో సోషల్ జస్టిస్ పార్టీ వ్యవస్థాపకులు చామకూర రాజు, రాష్ట్ర ఇన్‌చార్జి కేవీ గౌడ్, బీసీ సమన్వయ వేదిక రాష్ట్ర అధ్యక్షులు బొమ్మ రఘురాం, వెంకట్రామయ్య , బీసీ సంఘం జిల్లా అధ్యక్షులు అశోక్ గంగపుత్ర వివిధ బీసీ సంఘాల నాయకులు, బీసీ జేఏసీ ప్రతినిధులు, సామాజిక సంస్థల ప్రతినిధులు పాల్గొన్నారు.