వర్షాకాలానికి ముందే కరీంగూడ పైప్‌లైన్‌కు రక్షణ కల్పించాలి… కలెక్టర్‌కు వివరించిన బర్రె జహంగీర్ మాజీ మున్సిపల్ చైర్మన్
రాయల్ పోస్ట్ న్యూస్ జూన్ 22/ వర్షాకాలాన్ని దృష్టిలో ఉంచుకుని భువనగిరి పట్టణానికి హైదరాబాద్ నుంచి హెచ్‌ఎండబ్ల్యూఎస్‌ఎస్ ద్వారా సరఫరా అవుతున్న 5.70 ఎంఎల్‌డీ కృష్ణా మంచినీటి పైప్‌లైన్‌కు తక్షణమే రక్షణ చర్యలు చేపట్టాలని బర్రె జహంగీర్ మాజీ మున్సిపల్ చైర్మన్, జిల్లా కలెక్టర్, అదనపు కలెక్టర్ (స్థానిక సంస్థలు)కు వినతిపత్రం అందజేశారు.
కరీంగూడ వాగు వద్ద అక్రమ ఇసుక తవ్వకాల కారణంగా పైప్‌లైన్ పూర్తిగా బయటపడిపోయి తేలాడుతున్న పరిస్థితి నెలకొందని ఆయన తెలిపారు. భారీ వర్షాల సమయంలో వాగు ఉద్ధృతి పెరిగితే పైప్‌లైన్ దెబ్బతిని కొట్టుకుపోయే ప్రమాదం ఉందని, దీంతో భువనగిరి పట్టణంలో మంచినీటి సరఫరాకు తీవ్ర అంతరాయం ఏర్పడే అవకాశం ఉందని పేర్కొన్నారు.
హైదరాబాద్ నుంచి వచ్చే నీటి ఒత్తిడి కారణంగా ఎయిర్ లీక్ ట్యాంక్ సామర్థ్యాన్ని మించి నీరు చేరి ఓవర్‌ఫ్లో అవుతూ ప్రతిరోజూ పెద్దఎత్తున తాగునీరు వృథా అవుతోందన్నారు. అదేవిధంగా పట్టణంలోని పలు ప్రాంతాల్లో పైప్‌లైన్ లీకేజీలను సకాలంలో మరమ్మతు చేయకపోవడంతో వేల లీటర్ల నీరు వృథా అవుతోందని ఆవేదన వ్యక్తం చేశారు.
వర్షాకాలానికి ముందే మున్సిపల్ కౌన్సిల్ అత్యవసర సమావేశం నిర్వహించి తీర్మానం చేయాలని, అవసరమైతే 15వ ఆర్థిక సంఘం నిధులను వినియోగించి పైప్‌లైన్‌కు రక్షణ గోడలు, మరమ్మతులు చేపట్టాలని కోరారు. హెచ్‌ఎండబ్ల్యూఎస్‌ఎస్ అధికారులు, మున్సిపల్ యంత్రాంగం సమన్వయంతో తక్షణ చర్యలు తీసుకుని పట్టణ ప్రజలకు ఎలాంటి మంచినీటి ఇబ్బందులు తలెత్తకుండా చూడాలని విజ్ఞప్తి చేశారు.