యాదాద్రి భువనగిరి జిల్లాలో స్లాటర్ హౌస్ కబేల నిర్మించాలి మహమ్మద్ షరీఫ్ కాంగ్రెస్ పార్టీ సీనియర్ నాయకులు

​యాదాద్రి భువనగిరి జిల్లాలో స్లాటర్ హౌస్ (కబేలా ) నిర్మించాలి: మహమ్మద్ షరీఫ్ డిమాండ్
​
యాదాద్రి భువనగిరి జిల్లా కేంద్రం లో నూతన స్లాటర్ హౌస్ (కాబేలా ) ఏర్పాటు చేయాలని ఈరోజు భువనగిరి శాసనసభ్యులు అనిల్ కుమార్ రెడ్డికి వినతిపత్రం అందించిన కాంగ్రెస్ పార్టీ మైనార్టీ సెల్ రాష్ట్ర కోఆర్డినేటర్ మొహమ్మద్ షరీఫ్. ఈ సందర్బంగా వారు మాట్లాడుతూ యాదాద్రి భువనగిరి జిల్లా ఏర్పడి దాదాపు 10 ఏళ్లు కావస్తోందని, కాలక్రమేణా ఇక్కడి జనాభా కూడా గణనీయంగా పెరిగిందని మహమ్మద్ షరీఫ్ పేర్కొన్నారు. జనాభా పెరుగుదలతో పాటు మటన్ (మేక, గొర్రె మాంసం) వినియోగం కూడా బాగా పెరిగిందన్నారు. అయితే ఇన్నేళ్లు గడిచినా జిల్లాలో ఇప్పటివరకు ఎలాంటి ప్రభుత్వ స్లాటర్ హౌస్ (కాబేలా ) ఏర్పాటు చేయకపోవడం అత్యంత విచారకరమని ఆయన ఆవేదన వ్యక్తం చేశారు.
​జిల్లాలో క్రమబద్ధమైన కాబేలా లేకపోవడం వల్ల స్థానిక మటన్ అమ్మే వారు నిత్యం వధించే మూగజీవాల ఆరోగ్యాన్ని తనిఖీ చేసే వ్యవస్థే లేకుండా పోయిందని మహమ్మద్ షరీఫ్ ఈ సందర్భంగా అన్నారు. జంతువులు ఏదైనా వ్యాధితో బాధపడుతున్నాయా లేదా అని చూసేందుకు, వాటికి వైద్య పరీక్షలు (Medical Inspection) నిర్వహించేందుకు ఎలాంటి యంత్రాంగం లేదన్నారు.
​దీనివల్ల అమాయక ప్రజలు తెలియకుండానే అనారోగ్యంతో ఉన్న గొర్రెలు, మేకల మాంసాన్ని తింటూ తీవ్ర వ్యాధుల బారిన పడుతున్నారని ఆయన ఆందోళన వ్యక్తం చేశారు. ప్రజలు ఈ తీవ్రమైన ప్రమాదాన్ని, దానివల్ల ఆరోగ్యంపై పడే దుష్ప్రభావాలను గమనించలేకపోతున్నారని చెప్పారు.
​కావున, యాదాద్రి భువనగిరి జిల్లా ప్రజల ఆరోగ్యాన్ని, ప్రాణాలను దృష్టిలో ఉంచుకుని అధికారులు తక్షణమే జిల్లాలో ఒక ఆధునిక స్లాటర్ హౌస్‌ను నిర్మించాలని మహమ్మద్ షరీఫ్ డిమాండ్ చేశారు. ఈ స్లాటర్ హౌస్ లో నిపుణులైన వైద్యుల ద్వారా జంతువులకు వైద్య పరీక్షలు నిర్వహించి, 'మెడికల్ ఫిట్‌నెస్ సర్టిఫికేట్' ఇచ్చిన తర్వాతే వాటిని వధించేందుకు అనుమతించాలని కోరారు. తద్వారా ప్రజలకు ఆరోగ్యకరమైన, స్వచ్ఛమైన మాంసం అందుబాటులోకి వస్తుందని, వారి ప్రాణాలకు రక్షణ ఉంటుందని ఆయన పేర్కొన్నారు.