షేర్: f 𝕏 ✉ ✈ in @
royalpost.co.in 22 నవం 2026, 12:20 ఉద.
క్రైమ్ వార్తలు

Russian Ship Drone Attack: రష్యా నౌకపై ఉక్రెయిన్‌ డ్రోన్ల దాడి?

Telugu daily news from Telangana and Hyderabad
ప్రచురణ తేదీ: 22 నవం 2026, 12:20 ఉద. రచన: One News Desk
5 వీక్షణలు 0 వ్యాఖ్యలు

ఫిన్‌లాండ్‌ కీలక ప్రకటన
ఫిన్‌లాండ్‌ సమీపంలో రష్యా నౌకపై డ్రోన్‌ దాడి..
ఉక్రెయిన్‌కు ప్రతిదాడి హక్కు ఉంది: ఫిన్‌లాండ్‌ ప్రధాని
గల్ఫ్‌ ఆఫ్‌ ఫిన్లాండ్‌లో రష్యా వాణిజ్య నౌకపై దాడి..

హెల్సింకి, ఆంధ్రప్రభ: ఉక్రెయిన్‌ యుద్ధ ప్రభావం ఫిన్‌లాండ్‌ సమీప ప్రాంతాలకూ విస్తరిస్తోందని ఆ దేశ ప్రధాని పెటెరి ఓర్పో ఆందోళన వ్యక్తం చేశారు. గల్ఫ్‌ ఆఫ్‌ ఫిన్లాండ్‌లో రష్యాకు చెందిన వాణిజ్య నౌకపై డ్రోన్‌ దాడి (Russian Ship Drone Attack) జరిగిన నేపథ్యంలో ఆయన ఈ వ్యాఖ్యలు చేశారు. రష్యా దురాక్రమణకు వ్యతిరేకంగా పోరాడే హక్కు ఉక్రెయిన్‌కు ఉందని స్పష్టం చేశారు.

ఈ మేరకు ఆయన సామాజిక మాధ్యమం ఎక్స్‌లో స్పందిస్తూ.. తమ సమీప ప్రాంతాలకు కూడా యుద్ధం విస్తరిస్తోందని పేర్కొన్నారు. గల్ఫ్‌ ఆఫ్‌ ఫిన్లాండ్‌లో రష్యా వాణిజ్య నౌకపై డ్రోన్‌ దాడి జరిగిన ఘటనను అక్కడి అధికారులు పర్యవేక్షిస్తున్నారని తెలిపారు. దురాక్రమణకు పాల్పడుతున్న దేశానికి వ్యతిరేకంగా ఉక్రెయిన్‌ పోరాడే హక్కు కలిగి ఉందని వ్యాఖ్యానించారు. ఉక్రెయిన్‌ ప్రయోగించినట్లు అనుమానిస్తున్న డ్రోన్లు రష్యా నౌకను లక్ష్యంగా చేసుకున్నట్లు సమాచారం. దాడికి గురైన నౌకలోని సిబ్బందిని సమీపంలోని మరో సరకు రవాణా నౌకలోకి తరలించారు. వారిని నేరుగా రష్యాకు పంపించనున్నట్లు ఓ మీడియా వెల్లడించింది.

రష్యా సాయుధ దళాలతో సంబంధాలున్నట్లు భావిస్తున్న ‘స్పార్టా-2’ నౌక ప్రస్తుతం ఫిన్‌లాండ్‌లోని దక్షిణ ప్రాంత పట్టణమైన లోవీసా తీరానికి సమీపంలో లంగరు వేసి ఉంది. సముద్రంలోనే మంటలను అదుపు చేసే చర్యలు కొనసాగుతున్నాయి. ఫిన్‌లాండ్‌ బోర్డర్‌ గార్డ్‌ అభ్యర్థన మేరకు రష్యాకు చెందిన ‘ముర్మాన్‌’ రక్షణ నౌక కూడా సహాయక చర్యల్లో పాల్గొంటోందని అధికారులు వెల్లడించారు.

గగనతలం, సముద్ర మార్గాల్లో ఆంక్షలు

శనివారం ఉదయం అంతర్జాతీయ జలాల్లో రష్యా నౌకను లక్ష్యంగా చేసుకుని డ్రోన్‌ దాడి జరిగినట్లు తమ బలగాలు గుర్తించాయని ఫిన్‌లాండ్‌ రక్షణ శాఖ ప్రకటించింది. ప్రాథమిక సమాచారం ప్రకారం నౌక దెబ్బతిన్నట్లు తెలిపింది. ఘటన నేపథ్యంలో ఫిన్‌లాండ్‌ బోర్డర్‌ గార్డ్‌ బృందాలను అక్కడికి పంపించారు. ఫిన్‌లాండ్‌ గస్తీ విమానం తీసిన చిత్రాల్లో నౌక వెనుక భాగం నుంచి మంటలు, దట్టమైన పొగ వెలువడుతున్నట్లు కనిపించిందని సమాచారం. ఫిన్‌లాండ్‌ తీరంలోని లోవీసా ప్రాంతానికి సమీపంలో, గోగ్‌లాండ్‌ ద్వీపానికి పశ్చిమాన ఈ దాడి జరిగినట్లు అధికారులు గుర్తించారు. దీంతో గల్ఫ్‌ ఆఫ్‌ ఫిన్లాండ్‌ తూర్పు ప్రాంతంలో గగనతల, సముద్ర రవాణాపై తాత్కాలిక ఆంక్షలు విధించారు.

ఘటన తీవ్రంగా పరిగణిస్తున్నాం: అధ్యక్షుడు

రష్యా నౌక ‘స్పార్టా-2’పై జరిగిన ఘటనను ఫిన్‌లాండ్‌ అధ్యక్షుడు అలెగ్జాండర్‌ స్టబ్‌ తీవ్రంగా పరిగణిస్తున్నట్లు తెలిపారు. పరిణామాలపై దేశ విదేశాంగ, భద్రతా విధానాల ఉన్నతాధికారులు, రక్షణ దళాలు, బోర్డర్‌ గార్డ్‌ విభాగాలతో నిరంతరం సంప్రదింపులు జరుపుతున్నట్లు వెల్లడించారు. ఈ ఘటన గురించి తమ కీలక భాగస్వామ్య దేశాలు, మిత్రదేశాలకు సమాచారం అందించినట్లు ఎక్స్‌లో పేర్కొన్నారు. అధికారులు వేగంగా, వృత్తిపరంగా స్పందించారని ప్రశంసించారు. దేశ భద్రతకు ఎలాంటి ముప్పు కలగకుండా అవసరమైన చర్యలు తీసుకుంటున్నామని భరోసా ఇచ్చారు.

#క్రైమ్వార్తలు #అంతర్జాతీయం
ఫిన్‌లాండ్‌ కీలక ప్రకటనఫిన్‌లాండ్‌ సమీపంలో రష్యా నౌకపై డ్రోన్‌ దాడి..ఉక్రెయిన్‌కు ప్రతిదాడి హక్కు ఉంది: ఫిన్‌లాండ్‌ ప్రధానిగల్ఫ్‌ ఆఫ్‌ ఫిన్లాండ్‌లో రష్యా వాణిజ్య నౌకపై దాడి.. హెల్సింకి, ఆంధ్రప్రభ: ఉక్రెయిన్‌…